Претседателот на Србија, Александар Вучиќ, изјави денеска дека поради инвестицијата во Институтот Торлак, Србија ќе стане „суперсила“ во производството на вакцини, не само на руската вакцина против коронавирусот Спутник V, туку и на нова, четиривалентна вакцина против грип.

Вучиќ за телевизијата Б92 изјави дека 20 милиони евра се „издвоени веднаш“ преку Канцеларијата за јавни инвестиции за реновирање на зградата на „Торлак“, а потребни се уште 18 милиони евра за машините за пакување вакцини.

„Инвестицијата во опрема за четиривалентната вакцина против грип е 100 милиони евра“, рече Вучиќ, додавајќи дека ваквата вакцина нема да започне да се произведува веднаш, но оти „верува дека можеме да ја добиеме за четири години“.

Тој рече дека и кинеската вакцина на Синофарм против коронавирусот ќе се произведува во Србија.

Говорејќи за почетокот на производството на руската вакцина против коронавирусот, Вучиќ рече дека поради тоа не добил критики од ЕУ.

„Не верувам дека им пречи, но не сум сигурен дека се воодушевени“, рече Вучиќ и додаде дека е „добро“ Србија да биде „на европскиот пат“.

Извор: Бета