Претседателот на Србија, Александар Вучиќ, во денешното обраќање до јавноста, говорејќи за дијалогот со Приштина, изјави дека Белград сака разговорите да бидат суштински, а не формални, да се видат конкретни чекори и тие да ги решават проблемите, јави дописникот на МИА од Белград.

-Приштина го посочи проблемот со реципроцитет, ние рековме, нема проблем, за пласманот на нашата стока, нека на пратките пишува „Србија”, не мора „Република Србија”. Но, тие тоа го одбија, кажа Вучиќ.

Тој повтори дека Белград сака економска соработка, затоа што е важно да се почитуваат четирите клучни слободи – протокот на луѓе, стоки, услуги и капитал.

-Ние не зборуваме за суштински проблеми, српската страна се подготвува за дијалогот на 7 септември, кога ќе побарам исполнување на договорот од 2013 година, кој беше потпишан под покровителство на ЕУ, а тоа е формирање на Заедницата на српски општини (ЗСО).

Тој ја оцени како ужасната веста за усвојување на закон за заштита на вредностите на ОВК во Приштина, бидејќи тоа е воведување на вербален деликт, забрана за поинакво мислење и дополнително вознемирување на Србите.

Српскиот преседател потенцираше дека Србија нема да го напушти дијалогот.

-Ние сакаме вистински дијалог, а не само да ни кажуваат како треба да ги признаеме…Јас тоа го кажав на Палмер и на Гренел, го кажав тоа и пред Тачи, на сите. Јас ги разбирам, тоа е политика на нивните земји…Но, ајде да зборуваме за отворање на железнички линии, авиокомпании…некои очигледно не се заинтересирани за тоа, кажа Вучиќ.

Владиниот координатор на Приштина за дијалог со Белград, Скендер Хисени, во четвртокот изјави дека договорот меѓу двете страни за взаемно признавање на Косово и Србија ќе се постигне за 12 месеци или процесот на помирување ќе пропадне целосно.