Претседателот на Србија, Александар Вучиќ, денеска се сретна со делегација на Светска банка, предводена од регионалниот директор на Светска банка за Западен Балкан, Европа и Централна Азија, Линда Ван Гелдер.

Како што јави дописникот на МИА од Белград, за време на состанокот, Вучиќ и претставниците на Светска банка разговараа за напредок на агендата за економски раст, за програмата „Зелен раст” на Европската унија, како и за иницијативата за мини Шенген.

Српскиот претседател ги замолил претставниците на Светска банка да ја приближат иницијативата за регионалното економско поврзување (мини Шенген) до партнерите од регионот и да им ги презентираат економските придобивки што оваа иницијатива може да ги има за сите земји во регионот. Особено што првите анализи на Светска банка укажуваат дека воведувањето на мини Шенген би довело до големи заштеди во трошоците на трговската размена од дури 10 отсто до 14 отсто на годишно ниво, соопштија од кабинетот на српскиот претседател.