Српскиот министер за одбрана Милош Вучевиќ изјави дека по настаните на северот на Косово на 24 септември клучното прашање е кој дозволил косовската полиција од југ да дојде на север на Косово, спротивно на бриселскиот договор.

„Некој очигледно му дозволува на Албин Курти да гради бази на север, за да влезат тешко вооружени полицајци“, изјави Вучевиќ за РТС.

Тој нагласи дека некој дозволил да се направи „мимикрија на избори“ на северот на Косово, за да го смени шефот на полицијата за северниот регион, Ненад Ѓуриќ.

„Србија го осуди убиството на косовскиот полицаец, но она што се случи потоа беше страшно, Србите беа ловени како ѕверови во шумите. Се гледа дека некој добро го подготвувал, кога ќе ги погледнете снимките кои сукцесивно ги објавуваат. Сето тоа бара дополнителна истрага“, вели Вучевиќ.

Тој посочи и дека Србија е во голема мера разочарана од реакцијата на КФОР, кој мора прв да реагира во вакви ситуации, да спречи натамошно крвопролевање, како и да излезе ЕУЛЕКС доколку има елементи за истрага.

„КФОР мораше да престане со понатамошното пукање. КФОР има база недалеку оттаму, можеа да реагираат и како да застанаа на страна и им дозволија на добро распоредените косовски полицајци да продолжат да ловат Срби во Бањска“, ​​рече Вучевиќ.

Тој посочи дека Србија е на најниско техничко ниво на комуникација со КФОР, но дека „не можеме да ја прекинеме соработката“.