Второто полувреме кобно за Е. Пелистер
Ракометарите на Еурофарм Пелистер го доживеаја вториот пораз во Лигата на Европа откако загубија со 28:20 на гостувањето кај главниот фаворит во групата, Рајн-Некар Левен.
Битолчани одиграа одлично во првото полувреме, и беа рамноправен противник на германскиот тим во воведните минути од вториот дел по што домаќините дојдоа до предност од седум гола и ги решија дилемите околу победникот.
Ракометарите на Е. Пелистер одлично го започнаа натпреварот и по воведното водство се до средината на полувремето играа гол за гол (4:4 13. минута). Потоа грешките во нападот Рајн-Некар Левен ги казнува со брза серија од 3:0, но со два гола на Велковски и Периќ, пелистерци намалија на 8:7. Сепак на полувреме се замина со три гола предност за домашниот тим (14:11).
Во второто полувреме, избраниците на Жељко Бабиќ полека паднаа во играта, а тоа го искористи домашниот тим кој направи серија од 5:0 и го оствати Пелистер цели 13. минути (37-50 минута) без постигнат гол. За тоа време, предноста од 17:15 се зголеми на седум гола и со тоа беа решени сите дилеми околу победникот.
Периќ постигна пет гола за пелистерци, Мараш даде четири, а Велковски три, додека во редовите на Рахн-Некар Левер најпрецизен беше Вајгел со седум гола.
По три одиграни натпревари во Лигата на Европа, Е. Пелистер има еден бод од дуелот со Кадетен Шафхаузен и два порази.