Втора шанса за брејк на МЗТ Скопје
МЗТ Скопје вечерва (20 ч.) го игра вториот натпревар од финалната серија во АБА-2 лигата против Приморска. Во првиот дуел, вчера словенечкиот тим победи со убедливи 93:72 и поведе во финалето кое се игра до три победи.
Металците“ се убедени дека нема да им се повтори сликата од првиот натпревар кога беа надиграни од Приморска, пред се благодарение на одличниот шут за три поени (13/21).
– Уште кога го напуштивме паркетот по вчерашната пресметка почнавме да мислиме на денешниот дуел. Без разлика на тоа што се случи, не се предаваме однапред, ниту пак, мислиме дека Приморска е непобедлива. Синоќа тие имаа свој ден, зошто овој пат ние да бидеме тие што ќе погодуваат од секаде. Мора да ја подобриме агресивноста во одбраната и ако успееме во тоа ќе си овозможиме лесни поени, кои и тоа како се добри за моралот. Нема предавање, одиме да одиграме најдобро што знаеме – вели Лестер Медфорд.