САД втор ден по ред бележат трагичен рекорд по смртни случаи – во последните 24 часа, од корона вирусот починале 2.371 лице со што вкупниот број на жртви се искачи на 30.800.

Бројот на заразени надмина 640.000, а речиси 50.000 пациенти оздравеле.

Првите случаи на заразата во САД беа пријавени на 29 февруари. За 38 дена, бројот на жртви достигна 10.000, а само девет дена подоцна починаа 30.000 луѓе.

И покрај фактот што бројот на починати и новозаразени лица секојдневно сè уште е голем, во некои делови на Америка епидемијата опаѓа.

Гувернерите на 20 држави во кои има заразени, веруваат дека на 1 мај можат повторно да ја придвижат економијата, датум кој претседателот Доналд Трамп го означи како почеток на отворањето на земјата

Гувернерот на американската сојузна држава Њујорк, Ендру Куомо, денеска изјави дека ќе нареди сите граѓани на оваа држава да носат заштитни маски или со облека да го покриваат лицето во јавноста за да се спречи ширењето на коронавирусот.

„Бизнис инсајдер” пренесува дека уредбата од утре  стапува во сила.

Куомо додаде дека втор ден по ред опаѓа бројот на пациенти во болниците заразени со коронавирус и нагласи дека здравствениот систем на оваа сојузна држава сега е стабилизиран до таа мерка да може да дава респиратори на други држави, пренесоа британските медиуми

Гувернерот, исто така, го изнесе и планот за повторно отворање на економијата, но во фази, почнувајќи од најбитните компании и оние кај кои ризкот од ширење на епидемијата со отворањето е најмал.