Денес времето во Македонија ќе биде претежно сончево, а особено во западните предели ќе дува слаб до умерен ветер од западен правец и истиот повремено ќе засилува на интензитет. Во вечерните часови облачноста ќе се зголемува и во текот на ноќта во западните предели ќе има врнежи од снег. Температурите ќе се искачуваат во интервалот од 2 до 8 степени, вели временската прогноза на Славчо Попоски за Утрински брифинг.

Во Скопје и околината времето ќе биде сончево со слаб ветер од променлив правец. Во текот на ноќта облачноста ќе се зголемува и ќе има повремени врнежи од снег. Максималната температура ќе се искачи до околу 5 степени.

Потоа утре врнежите од снег ќе се прошират и во останатите предели, а ПОИНТЕНЗИВНИ ќе бидат во западните предели каде насекаде ќе се формира снежна покривка, а на планините истата ќе се зголеми. Мала снежна покривка ќе се формира и на другите места низ државава, освен во централните и во југоисточните предели. Ќе започне да дува умерен, а долж Повардарието засилен ветер од северен правец. Температурите утре ќе бидат значително пониски и ќе се искачуваат во интервалот од -3 до 4 степени.

За време на викендот, како и во почетокот од следната недела времето ќе се задржи променливо облачно и МНОГУ СТУДЕНО со сончеви периоди. Локално ќе има услови за провејување на слаб снег. Ќе дува умерен до засилен ветер од северен правец, додека наутро температурите ќе бидат МНОГУ НИСКИ и понекаде ќе се спуштат до околу -15 степени, додека максималните ќе се искачуваат во интервалот од -5 до 3 степени.