Ракометарите на Еурофарм Пелистер вечерва (20.45 часот) на гостувањето кај словенечкиот Требње ќе се обидат да дојдат до првата победа во Лигата на Европа.

Пелистерци по три натпревари во Групата Д имаат скор од едно реми и два порази со кои се наоѓаат на претпоследното место на табелата. Битолчани во првото коло несреќно загубија кај ГОГ Гудме со 30:29 по што следеше и ремито против Кадетен Шафхаузен (25:25), за во третото коло да доживеат убедлив пораз од фаворитот во ова натпреварување Рајн-Некар Левен (28:20).

– Верувам дека во ова натпреварување нема фаворити, посебно што многу екипи имаа проблеми со ковид-19. Видовме дека Тримо Требње ја победи Татабања, иако унгарскиот тим беше фаворит. Мислам дека улогата на фаворит не треба ни да се спомнува. Важно ни е што се враќаме во натпреварувачки ритам, ова ни е трет натпревар во низа, имаме интензитет на тренинзите, играчите се поспремни од пред 10-15 дена и очекувам добра презентација на нашиот тим. Од мој тренерски агол можам да кажам дека Урош Зорман врши одлична работа. Одличен тренер е и тоа е видливо на секој чекор. Екипата е дисциплинирана, многу брза, казнува од транзиција, добро играат еден на еден и со пивотмен. Тимот е одлично селекциониран и добро воден од тренерот Зорман – вели тренерот на Е. Пелистер, Жељко Бабиќ.