Фудбалската репрезентација на Македонија вечерва (20.45 часот) во Вадуз ги продолжува настапите во квалификациите за Мундијалот во Катар кој ќе се одржи идната година.

Противник на фудбалерите е селекцијата на Лихтенштајн која е последнопласирана на табелата во групата Ј со само еден бод.

Фудбалерите се наоѓаат во серија од три нерешени резултати од септемврискиот квалификациски против Ерменија, Исланд и Романија и победата над Лихтенштајн е импрератив.

Евентуалниот триумф би бил прв и за селекторот Благоја Милевски откако го смени Игор Ангеловски на клупата по завршувањето на Европското првенство.

– Не чувствуваме притисок. Уверен сум дека фаворитската улога од која не бегаме ќе ја оправдаме и на утрешниот натревар. Ќе бидам задоволен со победа, ама за да дојдеме до неа ќе ни биде потребна максимална концентрација. Лихтенштајн особено на последните натпревари покажа дека се работи за цврста и добро организирана екипа, ќе треба да бидеме на најдоброто ниво – смета селекторот Милевски.

Репрезентацијата има добри спомени од гостувањата во Вадуз бидејќи токму таму во 1998 година беше остварена најубедливата победа во историјата на Македонија од 1:11.
Последната средба помеѓу Македонија и Лихтенштајн се одигра во март годинава во Скопје и заврши со убедлив триумф од 5:0.

– Фаворитската улога е на наша страна, не бегаме од неа. Наше е да дадеме максимум на теренот. Ако го исполниме тоа, сметам дека нема од што да се плашиме.Во модерниот фудбал сметам дека не постојат апсолутни фаворити. Мора да ја одиграме нашата игра, а ако тоа го исполниме ќе победиме на овој дуел – вели репрезентативецот Стефан Списовски.