Време е за џез: 9 дена до стартот на 38. Скопски џез фестивал – Слободен печат
ВестиКултура

Време е за џез: 9 дена до стартот на 38. Скопски џез фестивал

Скопскиот џез фестивал годинава, со исклучително силна програма и специјален фокус - ECM Records, ќе ја одбележи 50-годишнината од постоењето на култната германска издавачка куќа.

Фестивалот ќе го отворат две легендарни светски гитарски појави: еден од најживописните и најимагинативни композитори и иноватори на гитарата во последните 40 години – Дејвид Торн, како и триото на ултимативниот гитарски херој, неприкосновениот иноватор, композитор и импровизатор Фред Фрит.

Неодоливите мириси на Ориентот и Медитеранот ќе прострујат низ музиката на Ануар Браем – волшебникот на инструментот ут, автентичниот визионер и една од најголемите ѕвезди на дискографската куќа ECM, кој со својот квартет годинава прославува 10-годишнина од објавувањето на прославениот албум “The Astounding Eyes Of Rita”, како и низ звуците на грчкиот мајстор на лирата Сократис Синопулос кој ќе настапи со својот уникатен квартет во чии дела се испреплетуваат фолклорните форми, византиската и класичната музика, како и бројните облици на импровизација и џез.

50-годишнината на ECM годинава се совпаѓа и со 50-годишнината на еден од најзначајните, највлијателните и најреволуционерните бендови на 20-от век – Art Ensemble of Chicago, кои, предводени од основачите Roscoe Mitchell и Don Moye, ќе го одбележат овој јубилеј со славеничка светска турнеја, чиј европски сегмент ќе финишира во Скопје. Едновремено, норвешкиот пијанист, клавијатурист, композитор, аранжер и перкусионист Јон Балке ќе ѝ го претстави на публиката на 38. Скопски џез фестивал својот исклучително интересен и оригинален проект Batagraf во едно специјално, есклузивно издание.

И конечно, последниот фестивалски датум е резервиран за настапот на најпоетичниот пијанист на денешницата, норвешката џез-сензација Торд Густавсен со неговото трио, како и за концертот на квинтетот на новата голема американска саксофонистичка ѕвезда Џејмс Брендон Луис и контрабас рециталот на француската басистка, импровизаторка и композиторка, една од најдоминантните фигури на современата европска музика Жоел Леандре.

Програмата на фестивалот годинава опфаќа и диџеј сет на италијанскиот иновативен џез ентузијаст Никола Конте, концерти на домашните ECM вљубеници Next To Silence и еклектичниот „магичен оркестар“ на Џијан Емин, филмска проекција на документарниот филм посветен на ECM “Sounds and Silence: Travels with Manfred Eicher”, промоција и презентација на книгата “Cloud Arrangers” на словенечкиот фотограф Жига Коритник, како и доделување на наградата „Златен Орикс“ за најдобар млад џез-музичар во 2019 година.

Во продолжение прочитајте ја програмата.

ПРОГРАМА

17 OКТОМВРИ
20:00 Македонска опера и балет
DAVID TORN (САД)
FRED FRITH TRIO (САД)

18 OКТОМВРИ
20:00 Македонска опера и балет
SOKRATIS SINOPOULOS QUARTET (Грција)
ANOUAR BRAHEM QUARTET (Тунис/Германија/Шведска/Либија)
24:00 Клуб Епицентар
NICOLA CONTE dj set (Италија)

19 OКТОМВРИ
20:00 Македонска опера и балет
JON BALKE BATAGRAF (Норвешка)
ART ENSEMBLE OF CHICAGO (САД)
24:00 МКЦ Дансинг сала
DŽIJAN EMIN & THE MAGICAL ORCHESTRA (Македонија)

20 OКТОМВРИ
18:00 МКЦ Кино Фросина
JOELLE LEANDRE (Франција)
20:00 Македонска опера и балет
TORD GUSTAVSEN TRIO (Норвешка)
JAMES BRANDON LEWIS UNRULY QUINTET (САД)

ПРОГРАМА ПЛУС

15 ОКТОМВРИ, МКЦ Клуб и ресторан
20:00 | Награда „Златен орикс“ за најдобар млад џез музичар во 2019

16 ОКТОМВРИ, МКЦ Кино Фросина
20:00 | SOUNDS AND SILENCE: Travels With Manfred Eicher – документарен филм
22:00 | NEXT TO SILENCE (Македонија)

17. ОКТОМВРИ, МКЦ Кино Фросина
14:00 | CLOUD ARRANGERS на Жига Коритник – презентација на книга

Преземањето на оваа содржина или на делови од неа без непосреден договор со редакцијата на Слободен Печат значи експлицитно прифаќање на условите за преземање, кои се објавени на сајтот.

Тагови

Напишете коментар

Вашата адреса за е-пошта нема да биде објавена. Задолжителните полиња се означени со *

Close