Вработените во „Еурокомпозит” бараат згрижување на лицата кои не земаат плати

Тие денеска повторно се собраа во дворот на фабриката за да бараат решение од Владата.

Вработените во прилепски „Еурокомпозит” бараат конечно решение за нивниот проблем, односно згрижување на 64-те лица кои не земаат плати, на кои не им се исплаќаат придонеси и речиси два месеца се на принуден одмор.

Тие денеска повторно се собраа во дворот на фабриката за да бараат решение од Владата.

Роберт Богданоски, претседател на Синдикатот категорично вели дека бараат да им се реши ситуацијата на работниците.

– Повеќе од четири-пет месеци немаме никаква работа и не знаеме што да правиме. Работа немаме, нема ниту здравствено осигурување, директорите седат во канцелариите, а работниците се пуштени на принуден одмор. На принуден одмор сме речиси два месеца и не се знае до кога. Бараме од Владата да ја сфати сериозно ситуацијата. Може да ги пратат како стечајци и овие 64 вработени, па потоа нека наоѓаат решение за фирмата или нешто друго, но да се најде решение. Значи, бараме да се згрижат овие 64 работници, изјави Богданоски.

Законот за подмирување на заостанатите придонеси е донесен, но, нагласува Богданоски не е ефектуиран зашто нема претставник на државниот капитал.

-Законот за придонесите не може да се примени, зашто претставникот на државниот капитал на 3-4 декември минатата година е повлечен од функцијата, а без претставникот не можело да се свика Собрание на акционерите за да се реши проблемот. Имаше ветување дека ќе се назначи нов претставник за брзо време, но од тоа досега нема ништо, рече Богданоски.

Што се однесува до платите, немаат земено за целата мината година, туку им се исплаќаат пари од заостанатите плати.

-Земаме нешто линеарно и тоа е од заостанати плати, а всушност немаме плата земено за цела 2019 година. Имаме за земање од заостанатите плати по три до 4000 илјади евра и со минатата година се пет до 6000 евра, изјави Богданоски.

Работникот Горан Велески смета дека надлежните на сите нивни молби да ја решат ситуацијата, се оглушиле.

-Подолг период ги молиме директорот, од Управниот одбор, сите пратеници да ни помогнат. Оставени сме на улица. Ниту вработени сме, ниту невработени, изјави Велески.

Работниците имаат сознанија дека се продавале репроматеријали на други фирми, а ним би им требале за работа.

Инаку, од фабриката технолошки вишок заминаа 154 вработени. Сегашните работници најавуваат протести за решавање на проблемите.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот