Детонацијата што денеска се слушна над Париз и околината и притоа вознемири дел од населението била предизвикана од борбен авион, информира денеска француското воено воздухопловство од каде објаснија дека авион од типот „Рафал” го пробил звучниот ѕид за да му укаже помош на друг авион што загубил контакт со Контролата на летање.

Полициската префектура во Париз на Твитер објасни дека станува збор за борбен авион кој летал над звучната бариера за време на прелет над главниот град. Префектурата повика на смиреност и ги покани Парижаните да не ги оптоваруваат телефонските линии за итни случаи.

– Во рамки на мисијата за пресретнување, авионот ја проби звучната бариера, изјави министерката за вооружени сили Флоренс Парли, кој во моментот е во посета на летонската престолнина, Рига.

Воено воздухопловство на Франција потврди дека авион од типот „Рафал” од базата Сен Дизие „имал вистинска интервенција за да се обезбеди помош на авион при губење контакт”.

– Авионот „Фалкон 50″ во источна Франција загуби контакт со цивилната Контрола на летање. Оваа абнормална ситуација предизвика полетување на „Рафал“ во улога на воздушна полиција, објасни полковникот Стефан Спет, портпарол на француското воено воздухопловство. 

Детонацијата посебно ги вознемири и изненади играчите на тенискиот гренд слем Ролан Гарос.