НБА лигата го казни кошаркарот на Бруклин нетс бидејќи не сакаше да учествува во медиумските активности на својот тим, односно не сакаше да разговара со новинарите.

Откако ја доби казната, Ирвинг прокоментира „Не разговарам со пиони“ и ги налути медиумите во САД.

НБА ги казни Кајри Ирвинг и Бруклин нетс со по 25.000 долари бидејќи ги прекршија правилата на лигата за отвореност кон медиумите. Изминатата недела Ирвинг неколку пати одби да учествува на задолжителните активности на тимот.

Шампионот од 2016 година за кого медиумите во САД обвинуваат дека е подобар играч отколку личност, одговори со порака која ја напиша на својот Инстаграм профил и на вообразен начин и тоа се обиде да го оправда со борбата за социјална правда.

„Се молам да ги искористиме парите од казната за маргинилизираните заедници на кои им е потребна помош, посебно кога ќе се земе во предвид каде е светот сега. Јас сум тука за мир, љубов и големина. Затоа престанете да ме попречувате и мене и мојот тим и ценете ја уметноста. Ние тука поинаку се движиме.
Не разговарам со пиони. Моето внимание вреди повеќе“, напиша меѓу другото Ирвинг откако во првиот дел објави цитат од борецот за човекот права во САД, Малком Х.

Кавгата на Ирвинг со медиумите во САД не е новост, тој и во минатото избегнувал да дава изјави.

Тој не разговара со медиумите од февруари годинава откако го повреди коленото и предвреме ја заврши сезоната.
Кајри Ирвинг беше еден од најгласните НБА играчи кои заговараа дека сезоната треба да се прекине поради летните протести предизвикани од полициската бруталност и расната нееднаквост.

Тогаш Ирвинг беше нападнат од дел од кошаркарите кои заработуваат многу помалку но и од медиумите за дволичност бидејќи тој е повреден и секако нема да игра, а воедно е еден од најдоброплатените играчи во НБА лигата и може да си дозволи да „преживее“ неколку месеци без да земе плата.