Вечерва на „Олимпискиот“ стадион во Рим екипата на Рома со убедлив резултат 5:2 триумфираше против екипата Беневенто во најсилната италијанска лига.

„Вештерките“ први дојдоа во водство уште во петтата минута со голот на Капрари, а израмни „волчицата“ преку новото засилување Педро.

Четири минути подоцна босанскиот интернационалец Џеко ја обезбеди првата предност за римскиот клуб, а непосредно пред паузата мрежата на гостите ја затресе и Мхитарјан, но неговиот погодок беше поништен поради офсајд после прегледаната ВАР снимка.

Во 55 минута Беневенто изведе пенал кој го шутираше Лападула, не беше прецизен, но веднаш се поправи во следниот момент за нов егал на мечот.

Играчите на португалскиот тренер Фонсека го скршија отпорот на противникот со уште три голови во мрежата на Монтипо, а во листата на стрелците се најдоа уште Верету, потоа Џеко по вторпат на дуелот во 77 минута и Перез после асистенцијата на Кристанте.

Во претходните мечеви од неделната програма во Серија А: Болоња-Сасуоло 3:4, Специја-Фиорентина 2:2, Торино-Каљари 2:3. Македонскиот репрезентативец Илија Несторовски иако беше на клупата за резервни играчи не доби шанса во домашната победа на неговиот клуб Удинезе против Парма (3:2).