Претседателот на Буркина Фасо, Рох Каборе, е уапсен од бунтовнички војници, велат безбедносни извори и еден западноафрикански дипломат за Ројтерс.

Ваквиот развој на настаните уследи по интензивното пукање што се слушна околу неговата резиденција во главниот град Уагадугу. Пукањето се слушнало и во неколку касарни во Уагадугу, а војниците побарале смена на воените началници и повеќе средства во борбата против милитантните, јавува Би-Би-Си.

Стотици луѓе излегоа на улиците во знак на поддршка на војниците, принудувајќи ги властите да воведат ноќен полициски час. Демонстрантите кои ги поддржуваат војниците го запалија седиштето на владејачката партија, а истрели се слушаа во воените кампови на запад и југ од главниот град, како и во воздухопловната база во близина на главниот аеродром.

Во телевизиско обраќање до нацијата, министерот за одбрана Бартелеми Симпоре рече дека имало „локализирани, ограничени“ инциденти „во неколку касарни“ и дека ниту една од „републиканските институции“ не била цел.

Каборе, поранешен банкар и премиер, стана претседател по победата на изборите во 2015 година.