„Воините“ прв тим по Бостон со пет финалиња во низа
Голден стејт со 4:0 во победи го совлада Портланд треилблејзерс во финалето на Западната конференција и обезбеди пласман во големото НБА финале.
Ова ќе биде петто финале во низа за „воините“ и ќе имаат можност по четврти пат да стигнат до титулата. Со пласманот во финалето, Голден стејт го повтори успехот на Бостон селтикс кој од 1959 до 1966 година кој пет или повеќе години по ред играл во големото НБА финале.
– Би сакал нашиот успех да не биде потценет. Пет последователни настапи не било видено од 1960-тите години, од времето на Бил Расел. Тоа не се случило досега и сигурно постои добра причина за тоа. Навистина е тешко да се дојде до вакво остварување но изградивме култура на победување – вели Стив Кер, тренерот на Голден стејт.
Противник на Голден стејт во финалето ќе биде поуспешниот од финалната пресметка во Источната конференција во која Милвоки бакс води со 2:1 во победи против Торонто репторс.