Најпознатиот моден магазин на светот „Вог“, или модната библија како што го викаат често, и оваа година го анализираше стилот на познатите личности, а посебна задача било да издвојат дами чиј моден вкус се издвојува од другите.

Помеѓу многу ѕвезди, на престижната „Вог“ листа се најде и прекрасната војвотка од Сасекс Меган Маркл, која од неодамна стана препознатлива по безвременската класика, префинетост и едноставност во својот изглед.

После успешната година, која пред се ја одбележа раѓањето на бебе, 38-годишната Меган учествуваше во уредувањето на британското издание на „Вог“, а воедно ја смислила и модната колекција „Smart Set“ во соработка со организацијата „Smart Works“.

И оваа година „Вог“ ја избра Лејди Гага како една од најдобро облечените дами. Најголем впечаток од се убедливо остави виолетово-синиот „Valentino“ фустан кој Гага го носеше на доделувањето за Златните глобуси, а креацијата се смета за најдобриот фустан кој имавме прилика да го видиме во 2019 година.

Оваа публикација оддаде почит на американската ѕвезда која заплива и во актерските води, токму поради неверојатните таленти кои ги поседува во себе.

Во топ-10 заврши и Ријана. Светската ѕвезда позната по својот ексцентричен стил заслужи пофалби за допринос во уличната мода. Пејачката лансираше луксузна линија од брендот „Fenty“, а сепак успеа да го задржи својот препознатлив изглед. Најдобри модни моменти имаше во зелената „Fenty“ модна комбинација, дизајнирана специјално само за неа, која ја носеше на доделувањето модни награди во Лондон.

Помеѓу најдобро облечените дами се најдоа Наоми Кембл, Зои Кравиц, Лупита Нионго, Гема Чан, Трејси Елис Ројс, Фиби Волер Бриџ и Адвоа Абох.