Во жолт контејнер фрлајте пластика, во зелен стакло, во син хартија!
Од Друштвото за управување со пакување и отпад од пакување „Пакомак“ порачуваат дека е потребен минимален напор за да се селектира отпадот, а разликата е огромна.
Во синиот контејнер за хартија фрлете ги амбалажите од хартија. Тука спаѓа и тетрапак отпадот, какви што се амбалажите од млеко, сокови, сосови и друго. доколку имате поголема количина амбалажен отпад во вашиот дом, повикајте ги службите на локалното јавно претпријатие да ја преземат. Заедно да бидеме промената што сакаме да ја видиме во општеството и да изградиме подобра и почиста иднина за нашите деца, порачуваат од Друштвото за управување со пакување и отпад од пакување „Пакомак“.
Оттаму упатувајќи совети до населението за правилно селектирање отпад, велат дека селектирањето на отпадот и грижата за животната средина во која сите заедно живееме, почнува од секој од нас.
– Никој друг не може да го земе пластичното шише од вашиот дом и да го фрли во контејнерот за селекција освен вие самите, а вашиот избор не е само ваш, туку и избор за тоа како ќе живеат вашите деца – велат од „Пакомак“.
Во спротивно, како што посочуваат, стаклениот, пластичниот и хартиениот отпад завршуваат на депониите, кои имаат ограничен капацитет, каде што скапуваат и ги загадуваат водата, воздухот и почвата во која ја растеме храната за нас и нашите деца.
– Животната средина е местото каде што постоиме, се движиме, работиме, дишеме. Таа е основна човекова вредност и право, кое сме должни да го заштитуваме и унапредуваме. Заштитата на животната средина е темелна вредност дури и на уставниот поредок на нашата држава. Имаме право на чиста животна средина, но што е со нашите должности кон неа? – соопштија од „Пакомак“.
Оттаму појаснуваат дека заштитата на животната средина во Македонија претставува еден од најголемите предизвици на денешницата. Таа е, како што велат, наша должност, а негрижата за неа директно влијае врз сите нас, кои од неа ги црпиме ресурсите потребни за живот.
Според „Пакомак“, овие ресурси не се лесно обновливи, а се лесно уништливи, селекцијата на отпадот е огромно олеснување, се разбира доколку го сфатиме нејзиното значење и влијание.
– Секој би требало да има на ум дека со заштитата на животната средина – се штити себеси. Кога ќе ја достигнеме свеста дека е неопходно да ја чуваме околината во која живееме, парковите, игралиштата, излетничките места, шумите, езерата и живиот свет, ќе сфатиме дека само така го зачувуваме сопственото здравје. Посебно сега, кога контејнери за селекција има во секоја населба и во секој поголем маркет, ја имате можноста да бидете промената што сакате да ја видите во општеството. Потребен е минимален напор да се селектира отпадот, а разликата е огромна – истакна Ико Брдароски, оперативен директор во „Пакомак“.
Како што посочуваат од „Пакомак“, во жолтиот контејнер за пластика треба да се фрлат пластичната амбалажа и лименките. Тука спаѓаат и шишињата од детергенти, омекнувачи, оцет и масло. Во зелениот стаклените амбалажи од шишиња и тегли, а во синиот контејнер отпадот од хартија.