Во Велес хоспитализирани 76 пациенти, од нив 27 на кислородна поддршка
Во Велешката болница се хоспитализирани вкупно 76 пациенти, од кои 64 се потврдени позитивни на Ковид 19, пет се сомнителни и седум со негативни тестови. Пациенти освен на инфективното одделение се примаат и на Физикална и на Интерно, а слободни кревети има по некој.
Портпаролката на болницата д-р Весна Николовска Неделкова информира дека 49 пациенти се сместени на Инфективно одделение, 16 на Физикална и 11 на Интерно одделение. Од хоспитализираните 27 се на кислородна поддршка. На сите три одделенија, како што вели таа, има по некој слободен кревет
Во велешката болница, како што информира Николовска-Неделкова, вчера вечерта починала пациентка од Свети Николе на 56-годишна возраст потврдена позитивна. Утринава една пациентка на 73 години од Велес, потврдена позитивна била префрлена на Клиника за нефрологија во Скопје поради влошена бубрежна болест.