Булингот е се поприсутен помеѓу тинејџерите, но се помалку препознаен од самите нив, како и од наставниците и родителите. На оваа тема денеска во организација на Форум театар беше прикажана претстава која, како што велат организаторите, има за цел да го прикаже насилството од поблиска перспектива.

– Постојано се трудиме во однос на младите да најдеме креативни начини за справување со оваа проблематика, но и да ги вклучиме младите, за да го слушнеме нивниот глас и размислување за проблемите кои ги засегаат. Проблемите помеѓу врсниците најчесто ги пријавуваат возрасните. Тинејџерите поради срам или страв не се охрабруваат да пријават булинг. Но, често пати и не можат да препознаат дека се жртви на врсничко насилство – посочи Ана Битољану, мировна работничка во Меѓаши.

Таа апелираше до младите, да пријават на возрасно лице во кое имаат доверба, да се одмине стигматизацијата на детето кое доживува насилство, и да сфатат дека насилството не е модерно.

– Статистиката покажува дека на светско ниво, секое дете било сведок на вербално, физичко или сајбер насилство, а ситуацијата не е поразлична ниту во Македонија – информира Битољану.

Владо Караев од Форум Театарот вели дека театарската техника многу полесно допира до младите, за разлика од предевањата, од која можат да научат како децата, така и возрасните.

Во средното училиште „Никола Карев“ две години се одвива анти булинг проект, кој децата самоиницијативно го формирале.