СЗО извести денеска дека во последните 24 часа во светот се забележани рекордно нови 228.102 случаи на зараза од коронавирус.

Најголемо зголемување на бројот на заразени има во САД, Бразил, Индија и Јужна Африка. Претходен рекорд беше 212.326 нови случаи и тоа на 4. јуни. Бројот на починати од новиот коронавирус останува околу 5.000 дневно.

Бројот на случаи на ковид-19 во средата надмина 12 милиони според податоците на Ројтерс, а во седум месеци од ширењето на болеста, почина над 555.000 луѓе.

Мајк Рајан, од СЗО програмата за вонредни состојби, рече во петокот дека не е веројатно дека новиот коронавирус ќе се искорени.

„Во сегашната ситуација не е веројатно дека можеме да го искорениме вирусот“, рече тој на конференцијата за медиуми во Женева.

Тој рече дека светот со елиминираање на кластерите на заразата „потенцијално би можел да го избегне најлошото, новите пикови на пандемијата и враќањето назад на карантинските мерки“.

Рајан рече и дека појавата, на честото смртоносно воспаление на белите дробови во Казахстан „сигурно е на нивниот радар“ и додаде дека е можно да се работи за ковид-19.

„Влезната патека на ковид-19 во таа земја сугерира дека многу случаи всушност се недијагностицирани случаи на ковид-19“, оцени тој.

Марија ван Керхове, од СЗО надлежна за пандемијата на ковид-19, рече дека преносот на новиот коронавирус преку воздух секогаш бил причина за загриженсот, но дека изгледа капките се највообичаениот пат на заразата.

„Трансмисијата на аеросоли е една од формите на трансмисија која не загрижува од почетокот, посебно во здравствените установи каде знаеме дека тие капки можат да се претворат во аеросоли, што значи дека може да останат во воздух“, рече таа на конференцијата за медиуми.

СЗО вчера објави нови насоки во поглед на преносот на заразата од коронавирус, во кои наведе дека постојат некои извештаи за трансмисија преку воздух, но сепак не потврди дека се шири преку воздух, што пак не може да се спречи со социјално дистанцирање.