Во понеделник во големата сала на Центарот за култура „Антон Панов” во Струмица, ќе биде прикажан филмот „Сведок” по сценарио и режија на Митко Панов, беше соопштено на денешната прес конференција. Во филмот, кој е копродукција од повеќе земји, главната улога ја толкува актерската легенда, Бруно Ганц, кој почина во февруари година.

Според режисерот Панов, чии родители се од Струмица, филмот е една семејна и морална драма со елементи на романса.

– Многу ми е жал што не можеме заедно со Ганц да го промовираме филмот во нашата земја. Тој беше тука во 2015 година на Фестивалот „Манаки” во Битола и се договоривме повторно да се сретнеме на премиерата на филмот. За жал тоа не го дочекавме, но сакам да истакнам дека тоа му е последната главна улога – истакна режисерот Панов, кој додаде дека во неговиот филм игра уште и македонската актерка, Наташа Петровиќ.

Поголем дел од филмот е сниман во Македонија, но и на локации во Хрватска и Ирска, а премиерата на филмот беше лани во Скопје.

„Сведок” е дел од филмската трилогија на Панов заедно со „Војната заврши” и „Земјаци”.

Роден е 1963 година во Скопје. Дипломирал режија на Филмската школа во Лоѓ, Полска. Панов живее во Швајцарија, а поседува македонско и швајцарско државјанство.