Во Софија протести против одлуката на Макрон: „Не на лицемерието, Да на Македонија“
Вечерва пред француската амбасада во Софија, Бугарија се одржа протест, на кој демонстрантите се солидаризираа со Македонија и го изразија своето незадоволство од одлуката на претседателот Макрон да се блокира почетокот на пристапните преговори за Скопје и Тирана на последниот Совет на ЕУ.
Како што јавува БГНЕС, учесниците скандирале „Бугарија и Македонија под едно небо”, „Не на лицемерието, Да на Македонија”.
– Самиот настан не е против нешто, туку е за поддршка на Македонија и за забрзување на почетокот на нејзините преговори за членство во Европската Унија – изјави еден од организаторите на собирот, скулпторот Андреј Врабчев.
– Местото на Македонија е во Европа поради многу причини – како географски, така и културни. Како што нашето место е во Европа, логично е и Македонија да биде дел од ЕУ. Крајно време е границата меѓу Бугарија и Македонија да биде европска, односно да биде слободна, истакна Врабчев.
Според него, доколку Бугарија и Северна Македонија одново припаднат на два различни блока, ќе се создаде сценарио кое ќе биде многу драматично и ќе влијае врз целиот Балкански Полуостров. Во таков случај, смета Врабчев, земјава многу лесно може да западне во криза, бидејќи „има обиди за нејзина поделба, како и апетити кон неа од трети држави”