Во случајот со Максим Димитриевски вклучена внатрешната контрола на МВР
Откако кандидатот за градоначалник Максим Димитриевски, на својот Фејсбук профил објави видео во живо за што рече дека го запрела полиција и го пратила на технички преглед, со реакција се јави и Секторот за внатрешни работи Куманово.
Оттаму информираат дека во случајот ќе биде вклучена внатрешната контрола при МВР.
-Нема да дозволиме каков било притисок, го вклучивме Одделот за внатрешна контрола и професионални стандарди, велат од Министерството за внатрешни работи за случајот со кумановскиот градоначалник и независен кандидат, Максим Димитриевски.
„Во врска со денешниот случај во Куманово кога е сопрено возило „рено“, управувано од Д.Д., ве известуваме дека Министерството за внатрешни работи го вклучи Одделот за внатрешна контрола и професионални стандарди за целосно расчистување на случајот“, стои во соопштението од МВР.
Првично од МВР изјавија дека станува збор за редовна контрола и дека сообраќајна полиција го запрела возилото во кое се превезувал Димитриевски поради непрописно затемнети прозори на возило.