Во кабинетот на поранешниот претседател на државата Ѓорге Иванов се јадело и пиело без мерка. Како што објавува  „Фокус“  само во бифето на Вила Водно за четири месеци биле потрошени 512.000 денари или околу 8.300 евра за сокови, кафиња и води.

За првите четири месеци од годинава се потрошени 340.000 денари за оброци за обезбедувањето. Според податоците за првите четири месеци од годинава биле потрошени 200.000 денари за подароци, како вртоврски и марами. Во нив спаѓа и подарокот кој Иванов му го даде на папата Франциск, резба во износ од 38.000 денари.

Во последните месеци од мандатот на Иванов околу еден милион денари биле потрошени за ресторани. 32.600 денари биле потрошени за ручек со добитници на повелба во ресторанот „Стара куќа“. За ручек приреден во чест на добитници на медал во „Фиш ресторан“ биле потрошени 45.360 денари. Иванов приредил ручек и за некаква Комисија за најмлад научник, при што во „Старо буре“ биле потрошени 43.540 денари.