Во Португалија во ресторан само со ковид-потврда
Во Португалија се случува нов бран од пандемијата, а ако Португалците сакаат да влезат во ресторан ќе им треба ковид-потврда или негативен тест на коронавирус. Истото важи и за престој во хотел во регионите кои се најпогодени, одлучи владата.
„Се соочуваме со влошување на пандемијата“, рече портпаролката на владата Маријана Виеира да Силва и објави дека сега во земјата има 60 општини со висок или многу висок ризик од зараза, наспроти 45 минатата недела.
Во ризичните подрачја, како Лисабон, сѐ уште важи полицискиот час воведен минатата недела. Но, владата одлучи да ја укине забраната за движење меѓу Лисабон и остатокот од земјата за време на викендот затоа што и онака делта-сојот го има низ целата земја.
Според Националниот институт за здравство (Инса) од вторникот, делта-сојот е застапен кај 90 отсто од новозаразените во Португалија. Франција им препорача на своите граѓани летово да ги одбегнуваат Шпанија и Португалија како туристички дестинации.