Во Охрид изминатата седмица 221 новозаразен со Ковид-19, во Струга 181, 34 во Дебар
Седмичниот извештај на Центарот за јавно здравје од Охрид што ги опфаќа општините Охрид, Дебрца, Струга, Вевчани, Дебар и Центар Жупа покажува дека во периодот од 21 до 27 ноември лабораториски е дијагностицирано присуство на Ковид-19 кај 221 лице од Охрид, 181 лице од Струга и 34 лица од Дебар.
Во Охрид има 614 активни случаи на коронавирус, во Струга 427, а во Дебар 91. Во односниот период оздравени се 176 лица од Охрид, 115 лица од Струга и 25 лица од Дебар. Изминатата седмица се регистрирани по три смртни случаи во Охрид и Струга и два во Дебар.
Кога станува збор за вкупниот биланс од почетокот на епидемијата заклучно со вчерашниот ден Ковид-19 е регистриран кај вкупно 3405 лица во односните општини и тоа 1551 лице во општините Охрид и Дебрца, 1399 лица во општините Струга и Вевчани и 455 лица во општините Дебар и Центар Жупа. Оздравени се 949 пациенти од Охрид, 898 од Струга и 341 пациент од Дебар и Центар Жупа.
Црниот биланс досега е 52 починати од охридско, 88 од струшко и 21 лице од Дебар и Центар Жупа.