Во Москва над 7.700 новозаразени, од утре многу фирми нема да работат

Припадници на руската полиција патролираат во центарот на градот / 11 април 2020 / Фото: EPA-EFE/SERGEI ILNITSKY

Во Москва се регистрирани 7.704 новозаразени со коронавирусот, што е за илјада повеќе од претходниот ден. По налог на градоначалникот од денеска до 19 јуни во руската престолнина се прогласени неработни денови, објави агенцијата бета.рс.

Во цела Русија денеска се забележани 14.723 нови заразени, околу 1.200 повеќе од претходниот ден. Од почетокот на пандемијата се пријавени 5,2 милиони заразени и 126.000 смртни случаи.

На почетокот на јуни Москва бележеше околу 2.900 нови случаи дневно. Заради наглиот пораст на инфекцијата градоначалникот Сергеј Собјанин вчера ги прогласи наредните денови за неработни за најголем дел од фирмите, а на работниците ќе им бидат платени дневниците. Тој објасни дека одлуката се однесува на претпријатија и организации од сите видови и во сите форми на сопственост, освен за оние што се клучни за функционирањето на градот, како и за службите за безбедност и одбрана и некои стратешки индустрии.

Градоначалникот најави дека рестораните, баровите, ноќните клубови и сличните места ќе се затвараат во 23 часот, се до 20 јуни, затоа што целта сега е да се намали стапката на ширење на заразата со коронавирусот, кога веќе не може да се сопре.

Видео на денот