Власите во Мадрид соопштија денеска дека во последните 24 часа не е забележан ниту еден смртен случај како последици од ковид-19, првпат од почетокот на пандемијата која влијае и на регионалните избори во Шпанија.

„Одлични вести – вчера беше прв ден во Мадрид да нема ниту еден смртен случај“, објави на Твитер регионалната лидерка Изабел Диаз Ајусо додавајќи дека соработката ќе осигури „ноќниот кошмар да не се повтори“.

Со 72.000 забележани случаи на коронавирус и 8.400 смртни, Мадрид е најлошо погоден дел во Шпанија. Втора е Каталонија каде 61.000 луѓе се заразени, а 5.600 починаа.

Во Шпанија починаа 28.300 луѓе од коронавирусот

Според последните податоци, во Шпанија има вкупно 248.000 заразени, а умреа 28.300.

Пандемијата од коронавирус влијае и на кампањата за регионални избори во Шпанија па премиерот Педро Санчез на денешниот собир во Сан Себастијан носеше маска и одбегнуваше ракување со приврзаниците.

Изборите во регионите Баскија и Галиција предвидени се на 12 јули и ќе бидат први откако Шпанија прогласи карантин во март годинава. Рестриктивните мерки се ублажени на 21 јуни.

„Непријателот на Шпанија не е вирусот“, рече Санчез во салата во Сан Себастијан, обраќајќи се на ограничен број од стотина приврзаници на својата Социјалистичка партија, кои носеа заштитни маски и седеа на препорачанта меѓусебна дистанца од еден и пол метар, наведува Ројтерс.

Заради спречување на гужвите на избирачките места, гласањето ќе биде можно и преку пошта и во поштите, наведува агенцијата.