Во Лигата на шампионите не постојат договори, секој игра за себе
Тренерот на Интер, Антонио Конте, ја отфрли можноста Реал Мадрид и Борусија Менхенгладбах да одиграат нерешено со што и двата тима ќе одат во осминафиналето, а ќе извисат „нероаѕурите“.
Во пресрет на последното коло од групата Б во Лигата на шампионите, Борусија Менхенгладбах е лидер на табелата со осум бода, Реал Мадрид и Шахтјор имаат по седум, додека Интер е последен со пет бода, но има реални шанси да дојде до второто место.
– Не размислувам за теории на заговор. Лигата на шампионите е најсилно европско клупско натпреварување и тука нема никакви договори. Не сум загрижен за исходот од натпрварот во Мадрид, не сакам да се оптоварувам со други натпревари – изјави Конте.
Пред одигрувањето на последното коло во група Б кое ќе се игра утревечер, само една работа е сигурна, дека Борусија Менхенгладбах ќе ги продолжи настапите или во Лигата на шампионите или во Лигата на Европа, додека останатите три екипи мора да играат на победа.
Доколку Шахтјор го победи Интер во Милано тогаш украинскиот тим сигурно ќе игра во осминафиналето на ЛШ заедно со победникот од дуелот кој ќе се игра во Мадрид.
Единствената опција за Интер да остане во ЛШ е да го победи Шахтјор, а натпреварот во Мадрид да не заврши нерешено. Доколку и двата натпревари завршат без победник, тогаш во осминафиналето ќе играат Борусија и Шахтјор кој има подобар меѓусебен скор со Реал Мадрид.
– Сите екипи ќе играат за себе. Се надевам дека медиумите нема да се занимаваат со глупавите шпекулации. Размислувам само како да го победиме Шахтјор кој е одличен тим – вели Конте.