Не само во населбите Карпош 1 и Карпош 2, туку на целиот потег од улицата Франклин Рузвелт до булевар Осми Септември ќе се воведе зонско паркирање, односно во делот од Карпош што граничи со Центар. Општина Карпош веќе нарачала проект за регулирање на сообраќајот во мирување за потегот од Министерство за економија до „Салон 29“, а со зонско паркирање ќе биде опфатен и целиот простор кај Млечен и кај „Веро“ во Тафталиџе.

Градоначалникот Стевчо Јакимовски во неодамнешната комуникација во живо на „Фејсбук“ објасни дека ова се прави за да се заштитат граѓаните кои живеат во Карпош од оние што живеат во Центар, а своето второ и трето возило го паркираат преку улицата Рузвелтова, во соседната општина.

 Дури имаме случаи и на луѓе што продаваат возила и ги оставаат тука, па од тука ги продаваат. На ваков начин ќе се решиме и од хаварисаните возила. Ова не значи дека се откажуваме од изградба на катни гаражи, но додека ги работиме проектите, додека обезбедуваме средства, сметаме дека најбрз начин да ги решиме проблемите е да воведеме зонско – рече Јакимовски.

Гужвата по паркинзите ќе се решава со воведување зонско во Стар Аеродром