Коронавирусот е потврден кај уште 22 лица во Хрватска, па така вкупниот број на заразени достигна 657. Досега пет лица починаа од инфекцијата, информираа на прес-конференција за новинарите од Националниот штаб за вонредни ситуации.

Министерот за здравство Вили Берош рече дека петтата жртва е маж, а додаде и дека сега е особено важно да се остане дома. Медиумите претходно информираа дека станува збор за лице од Карловац.

На пресот е истакнато дека починатиот маж имал повишен крвен притисок, што е една од поризичните болести за инфекцијата.

Шефот на хрватскиот Завод за јавно здравство Томислав Цапак рече дека 20.070 лица се во самоизолација, а меѓу нив има и 542 здравствени работници.

Министерот за внарешни работи на Хрватска Давор Божиновиќ рече дека се утврдени 865 случаи на кршење на самоизолацијата и најави дека сите што ја прекршиле ќе заработат казни.

– Влегуваме во критично важен период во следните неколку недели. Мораме да издржиме во овој режим. Ги молам граѓаните да не излегуваат без некоја особена потреба – констатира Божиновиќ.