Oпштина Ѓорче Петров објави повик за реализација на проектот „За поубаво Ѓорче“.

„Право на учество имаат сите граѓани на Ѓорче Петров организирани во локални акциски групи со не повеќе од 20 лица, во партнерство со НВО со фокус на работа од областа на животната средина, заедници на сопственици и други физички и правни лица“, стои во повикот на општината.

Групите треба да се пријават во локалната самоуправа и да предложат најмногу пет локации на кои ќе изведуваат активности за чистење.

Комисија од општината ќе ги одобри локациите каде ќе се интервенира од страна на групите кои ќе успеат да земат учество во проектот. При чистењето, локалните акциски групи отпадот ќе го собираат во вреќи, но и ќе вршат селекција-пластика, стакло, метал, итн.

Рок за пријавување е најдоцна до 12 ноември. Наградата за најдобрата група ќе биде хортикултурно уредување на една парцела (по избор на победникот) која нема да биде поголема од 200 метри квадратни.