Во центарот на Амстердам повторно дозволено изнајмување преку Ер-би-ен-би
Откако холандски суд донесе одлука за укинување на забраната за изнајмување преку онлајн услуги како што е Ер-Би-Ен-Би (Airbnb), жителите на центарот на Амстердам повторно ќе можат да ги нудат своите домови на туристите.
Левичарските партии во Градскиот совет на Амстердам минатата година протуркаа забрана за изнајмување преку платформи како Airbnb во трите области што го сочинуваат централниот каналски прстен во Амстердам, со цел сузбивање на она што беше опишано како „непријатност предизвикана од туристи во старото градско јадро”.
Во случајот инициран од здружението на сопственици на имот, локалниот суд минатиот петок нареди укинување на забраната, заклучувајќи дека одлуката не е правно основана.
Како одговор, градот соопшти дека од денеска жителите на овие области можат да аплицираат за истата дозвола што им е достапна на сопствениците на домови лоцирани на друго место во градот, давајќи им право да ги изнајмат своите куќи и станови до 30 ноќи годишно за најмногу четири луѓе во исто време.