Во Битола одбележани 120 години од смртта на Гоце Делчев
Пред спомен куќата на Гоце Делчев во Битола денеска беше одбележана 120-годишнината од смртта на македонскиот револуционер. Делегација од Општина Битола, предводена од градоначалникот Тони Коњановски, придружуван од претставници на Советот на општината, како и претставници на политичките партии, Ансамблот за фолклор „Гоце Делчев”, основното училиште „Гоце Делчев” и други граѓани, положија цвеќе на великанот на македонската национална борба.
-Денешниот ден е оддавање почит кон македонскиот национален херој, апостол и срцето на револуционерна Македонија, идеолог, организатор и водич, високо свесен, пред своето време, вистински алтруист, космополит кој го разбирал светот единствено како поле за културен натпревар на народите. Одбележувајќи 120 години од смртта на Гоце Делчев, истовремено одбележуваме и 120 години од големото наследство кое ни го остави оваа импозантна личност, која со гордост и пиетет ја славиме. Неговиот лик и дело не потсетуваат и ни помагаат да се издигнеме од сите премрежја и предизвици и да останиме достојни за неговата идеја и жртва, а како негови горди потомци, да продолжиме да ја чуваме и негуваме искрата на национална одржливост. Слава му! – рече Коњановски.