Во Берлин има итна помош за бебиња кои плачат: Клиниката им нуди помош на исцрпените родители
Откако Дара Филдс објави на „Твитер“ дека во Берлин има итна служба за бебиња кои плачат, не е тешко да се види зошто многумина се љубоморни на жителите на германската престолнина.
„Во Берлин има амбуланта за бебиња кои плачат. Ако вашето бебе плаче премногу, а вие сте исцрпени, доаѓаат кај вас, ја проверуваат вашата емоционална состојба и ви даваат совети“, раскажа Филдс.
Покрај во Германија, услугата „Schreibaby Ambulance“, што во превод значи „Клиника за бебиња кои плачат“, е достапна и во Австрија, Швајцарија и Луксембург. Целта е на новите мајки да им се понуди поддршка во моментите на очај, страв и исцрпеност што тие често ги чувствуваат додека балансираат помеѓу сопственото физичко закрепнување и новороденчето што плаче.
There is a Crying Baby Ambulance in Berlin. If your baby is crying too much & you are just done, they come to you, check on you emotionally, & give advice. They have groups & an out patient clinic with regular follow up for the family. This should exist in all communities.
— Dara Fields APRN, CNM (@darafieldsTX) August 3, 2022
Кога ќе пристигне брзата помош на родителите им се нуди да се дистанцираат, како и да научат нови и иновативни начини да се грижат за уникатните потреби на своето бебе.
Оваа услуга може да ја користат родители на деца до 3 години. Помош нудат и социјалните работници, наставници и психолози, кои делат совети за спиење, исхрана, однесување и се друго што може да го зголеми стресот и исцрпеноста кај родителите на малите деца.
Според Американската психолошка асоцијација, една од седум жени доживува постпородилна депресија, а студијата од јули 2022 година објавена во „Journal of Psychiatric Research“ покажува дека стапките значително се зголемиле од почетокот на пандемијата на коронавирус.
Студијата од 2019 година објавена во списанието „Academic Pediatrics“ покажа дека жените кои имаат „немирни“ бебиња имаат двојно поголема веројатност да имаат умерени до тешки депресивни симптоми.