Министерката за здравство Огерта Манастирлиу соопшти дека Албанија денеска доби нова пратка од 7.020 дози вакцини од Фајзер, а набрзо се очекува друга пратка со поголем број вакцини.

-Уште 7.020 дози на „Фајзер“ штотуку пристигнаа во Албанија; други дози на „Фајзер“, „Астра-Зенека“, „Синовак“ и „Спутник“ ќе продолжат да пристигнуваат и нема да застанеме ниту еден ден, до крајот. Она што се чинеше невозможно до пред само два месеци, се случува пред нашите очи секој ден! Албанците масовно се вакцинираат, а Албанија излегува од долгиот тунел на пандемијата, да се врати во живот со сите сили и да ја зголеми својата економија почнувајќи од туристичката сезона проследена со најголемиот пакет во историјата на инвестиции, домашни, приватни, но и јавни.  Најдоброто е пред нас, заедно ќе ја направиме Албанија нашата иднина, напиша министерката на Фејсбук.

Предходно, денес таа заедно со премиерот Еди Рама одблиску го следеше процесот на имунизација против ковид-19 на постари лица во градот Елбасан.

-Процесот на вакцинација ќе продолжи со планираната динамика, откако имавме мало забавување поради 48-часовната блокада на аеродромот поради штрајкот на контролорите. Досега се вакцинирани над 185 илјади постари лица или вкупно повеќе од 260.000, здравствени и просветни работници, вработени во градинки, новинари, полициски службеници, припадници на армијата и на Националната гарда, рече Манастирлиу.

Поради стабилната епидемиолошка состојба врз основа на вчерашната одлука на Комитетот на експерти за справување со пандемијата од вечерва полицискиот час почнува во 22:00 часот наместо во 20:00 и трае, како до сега, до шест часот. Од денес исто така почнаа летовите кон и од Велика Британија.