Во Аеродром ќе се решава проблемот со паркирањето, кај Мајчин дом ќе има нови 56 паркинг места
Во обид да се изнајде соодветно решение за овој долгогодишен проблем, а на иницијатива на станарите од зградата кај Мајчин дом, градоначалникот на Општина Аеродром Тимчо Муцунски, одржа средба со граѓаните од овој дел на Општината.
Паркирањето во Општина Аеродром и немањето доволно слободни паркинг места за локалното население е проблем кој се провлекува со години наназад во оваа скопска општина. Во обид да се изнајде соодветно решение за овој долгогодишен проблем, а на иницијатива на станарите од зградата кај Мајчин дом, градоначалникот на Општина Аеродром Тимчо Муцунски, одржа средба со граѓаните од овој дел на Општината.
- Тие ги соопштија нивните тековни проблеми од кои најголем проблем им е паркинг просторот. Во текот на 2022 година ќе ја почнеме и завршиме постапката за асфалтирање и обележуваме на просторот зад Мајчин Дом и на тој начин ќе обезбедиме нови 56 паркинг места. Дополнително, во соработка со Градски паркинг ќе изнајдеме решенија за проблемите со паркингот и на други локации ширум нашата општина. Ќе направиме сè што е во наша моќ и за зградите кои не се опфатени со зонското паркирање да смеат да паркираат на обележаните места – истакна градоначалникот Муцунски.
Тој меѓу другото најавува и дека токму ваквите средби со локалното население ќе станат редовна пракса.
- Се запознав со проблемите и барањата кои ги имаат овие луѓе и можам да ветам дека ќе направам сѐ што е во моја моќ за истите да се решат. Како нова локална власт ќе ги сослушаме сите граѓани и ќе најдеме заедничко решение за нивните проблеми – заклучи градоначалникот на Општина Аеродром.
Во својата предизборна програма, Муцунски вети дека до крајот на својот мандат, како локална самоуправа ќе обезбедат 3 000 нови паркинг места.