По оставката на поранешниот Генерален секретар на Владата, Драги Рашковски, опозициската ВМРО-ДПМНЕ бара „до крај да бидат истражени аферите во кој тој наводно е вовлечен, како и да биде испитана неговата имотна состојба“.

Од таму велат дека и поранешните директори на Фондот за здравство и Агенцијата за европски образовни програми , Ден Дончев и Лидија Димова, си поднеле принудни оставки, но без санкција.

Рашковски денеска поднесе оставка од функцијата во Владата, за, како што вели, „да го сочува достоинството и интегритетот“. Рашковски беше посочуван од опозицијата за низа афери за кои дел преземаа чекори Антикорупциската комисија и Јавното Обвинителство. Рашковски се поврзува со случаите Леонардо, Хеликоптерска единица, Софтвер, Џип..

„Изнудената оставка на Рашковски пропратена со арогантен напад на јавноста не е преземање на одговорност. Овие милионски скандали не се покриваат со оставка, потребана е одговорност и судска разврска“, реагираше денеска ВМРО-ДПМНЕ по оставката на Рашковски.