ВМРО-ДПМНЕ со ново барање за повлекување од функција: Оставка од Лидија Димова – веднаш
Три дена молк од Јавното обвинителство (ЈО) за случајот со 270.000 евра доделени на фризерница, а Лидија Димова, како актуелна директорка на Националната агенција за европски образовни програми и мобилност, во изминатите три години е загушена во криминал, се обвинува во соопштението на ВМРО-ДПМНЕ.
– Дали од тендери, дали од набавка на луксузни возила, џипови, дали од доделување на грантови, загушена е во криминал, а ЈО сè уште нема преземено никаков чекор. Цели три години се читаат и слушаат скандали низ медиумите со докази за проневери и сомнежи за криминал поврзани со Лидија Димова, а јавното обвинителство и финансиската полиција сè уште молчат. Замислете, фризерница која земала 270.000 евра за едукација за медиумска писменост, во 2017 година има завршна сметка со нето добивка од 3.000 денари, а веќе 2018 година откако почнува соработката со Лидија Димова и грантовите, истата фризерница има нето добивка од 2.700.000 денари или фризерница со две столчиња има добивка од околу 43.000 евра, е наведено во дописот потпишан од портпаролот на опозициската партија, Димче Арсовски.
Во соопштението се бара од Лидија Димова да си даде оставка веднаш оти, како што е напишано, „таков директор не смее да ја води институцијата, а секој минат ден како директор е ден повеќе да прикрива докази и сокрива документација истото како што се случуваше од Катица Јанева во СЈО“.