ВМРО-ДПМНЕ предлага укинувањето на пржинската влада да биде на седницата в среда
ВМРО-ДПМНЕ во дописот до претседателот на Собранието Талат Џафери бара нивниот предлог закон за измена на законот за Влада, односно укинување на пржинската влада која се избира 100 дена пред изборите, да оди во скратена постапка и тоа на седницата која веќе е закажана на 26 јануари (среда).
„Слободен печат“ дојде до Предлог-законот кој ВМРО-ДПМНЕ денеска ќе го достави до Собранието. Предлог-законот има 11 члена и предвидува да се избришат 10 члена и со тоа преодната влада која 100 дена пред изборите се формира за организирање на изборите да замине во историјата.
„Целта на предлогот на законот е бришење на одредби за функционирање на Владата на Република Македонија кои беа донесени заради организирање на предвремените избори за пратеници во 2016 година“, се вели во предлог-законското решение.