Очекуваме изборниот ден да помине во фер и демократска атмосфера, на ниво достојно на европските вредности, а тоа институциите мора да го обезбедат, рече портпаролката на ВМРО-ДПМНЕ Марија Митева.

– Во текот на вчерашниот ден бевме сведоци на обид за вршење поткуп, притисоци и заплашувања на граѓаните од страна на власта. До нас стигнуваа информации на кој начин и каде власта се обидуваше да изврши поткуп на граѓаните, за што многупати алармиравме и навремено ја информиравме јавноста. Сметаме дека ова е исклучително штетно за македонската демократија, но дозволете ми да потенцирам дека сме убедени дека граѓаните и покрај ваквите притисоци и опструкции ќе го искористат уставното право на глас од кој зависи заедничката иднина – рече Митева на прес-конференција.

Таа додаде дека согласно информациите кои ги сподели Државната изборна комисија досегашниот тек на гласањето е во најдобар ред со мали исклучоци, а настанатите проблеми се надминуваат.