ВМРО-ДПМНЕ: Министерството за култура да биде во Охрид

Фото: Фејсбук

Наместо да предлагаат атрактивни проекти пред изборите, партиите треба системски да пристапат во решавањето на проблемите, вели поранешниот пратеник и актуелен дописен член на МАНУ, Изет Зеќири.

Опозициската партија ВМРО-ДПМНЕ најави дека планира Министерството за култура и сите државни институции од културата да ги пресели во Охрид. Партијата вети дека ќе се погрижи граѓаните да решаваат како ќе се трошат парите од данокот што го плаќаат.

– Граѓаните на Охрид, но и на другите градови, ќе имаат можност самите да изберат за кој проект во нивниот град ќе се троши нивниот данок. Охрид е културна престолнина и тука треба да бидат сместени сите државни културни институции и управи, како и самото Министерство за култура, тоа се вика институционална децентрализација – рече лидерот Христијан Мицкоски на трибината „Промоции на политики – Македонија за сите луѓе“.

Поранешниот пратеник и актуелен дописен член на МАНУ, универзитетскиот професор Изет Зеќири, вели дека партиите наместо да предлагаат атрактивни проекти пред изборите, треба системски да пристапат во решавањето на проблемите.

– Треба да се пристапи рационално во создавање пофункционална локална власт. Би било добро да се размислува за реформи со цел поефикасна фискална децентрализација каде општините ќе имаат повеќе финансиски ресурси. А децентрализацијата на министерствата може да стане само дополнителен трошок за општините и плус проблеми за пат и за сместување на вработените. Овој предлог е чисто политички привлечен пред изборите – вели Зеќири.

Видео на денот