Властите во САД со предупредување: Под опасност сме од евентуален домашен тероризам
Министерството за безбедност на САД денеска издаде предупредување на опасност од евентуален домашен тероризам, односно насилство од противници на администрацијата на новиот американски претседател, Џо Бајден. Притоа не е наведена конкретна закана, но укажувањето се образложува со „атмосфера на зголемена опасност низ САД” за која се верува дека ќе биде „присутна” во наредните недели.
Министерството наведува дека пред издавање на предупредувањето се консултирало со безбедносните и со разузнавачките агенции за можност од домашен насилен екстремизам.
– Информациите покажуваат дека некои идеолошки мотивирани насилни екстремисти, кои не се согласуваат со оваа власт, ниту со предавањето на власта во Белата куќа, би можеле да продолжат со мобилизација со цел поттикнување насилство или насилни дејствија, се наведува во предупредувањето.
Американските власти го издадоа предупредувањето во момент на тензична атмосфера, три недели по упадот во Конгресот на САД од приврзаниците на поранешниот американски претседател Доналд Трамп кои се незадоволни од изборните резултати.