Владата утре ќе потпишува грант за изградба на спорната пречистителна станица за отпадни води во Скопје
Утре во Клубот на пратеници, со почеток во 12:00 часот ќе се потпише Договор за грант од ЕУ со ЕИБ за пречистителна станица за отпадни води во Скопје, најави Владата.
На потпишувањето на договорот ќе се обратат заменик на претседателот на Владата за европски прашања Бојан Маричиќ, министерот за финансии Фатмир Бесими, министерката за животна средина и просторно планирање Каја Шукова, евроамбасадорот Дејвид Гир и заменик претседателката на ЕИБ Лилјана Павлова.
Пречистителната станица беше предмет на големи контроверзи, откако лани во октомври, скопската градоначалничка Данела Арсовска обвини дека функционери на ВМРО-ДПМНЕ биле вмешани во малверзации со тендерот за изградба на пречистителната станица. Ова беше почеток на „расколот“ меѓу Арсовска и партијата што ѝ помогна да биде избрана, а таа во следните недели ги разреши сите директори на јавни претпријатија во Скопје од ВМРО-ДПМНЕ и постави свои луѓе.