Владата изготви Акциски план за справување со дезинформациите кои, како што изјави денеска премиерот Зоран Заев, стануваат сериозен упад во демократските и изборните процеси и влијаат на довербата на граѓаните во институциите и медиумите. Како што рече Заев планот опфаќа две компоненти, безбедносни и проктивни.

Планот опфаќа ревидирање на постоечките системи и процедури со цел намалување на можност за протекување на сензитивни информации, безбедно користење интернет, службена пошна, службен мобилен телефон, зајакнување на внатрешната инфраструктура и спречување на надворешни напади, протокол за кризни комуникации меѓу влада и министерствата за спротиставување на дезинформации кои се шират преку интернет портали и социјалните мрежи.

Заев рече и дека одговорите на прашања на граѓани и медиуми ќе се објавуваат на веб страната на Владата, а ќе се формира и акциска група за борба против дефинформациите која ќе ја координира министерот Роберт Поповски.

Премиерот најави и кампања за едукација за постоењето на штетното вијание на дезинформациите, за подигање на нивото на медиумска писменоста, како и за едукација на новинарите кои ги следат владините активности.

-Дезинформациите се еден од главните предизвици за демократијата во 2019 година и алатка за манипулација со граѓаните. Злоупотребата на технологијата за креирање лажни ентитети и  непостоечки измислени случувања станаа сериозен упад во демократските и изборните процеси и сериозно се закануваат да влијаат на довербата на граѓаните во институциите и медиумите, изјави на денешната прес-конференција премиерот Заев.

Тој додаде дека земјава во изминатите две години во повеќе наврати се соочила со масовно ширење дезинформации на социјалните мрежи и на традиционалните медиуми, а, како што рече, дел од информациите биле споделувани и од територии на други држави.

-Како одговор на овие сајбер закани и согласно заложбите за отвореност, отчетност и транспарентност Владата работи на Акциски план за справување со дезинформациите на системско ниво. Наша цел е да ја зајакнеме нацоналната безбедност и сигурноста на граѓаните на нашата земја и да ја браниме и унапредуваме демократијата, рече  Заев.

Тој појасни дека планот ќе биде даден на јавна дискусија и оти до изработката на неговата финална верзија ќе бидат чуени мислењата на сите чинители во општеството. Планот се состои од два дела, во првиот се опфатени безбедносни, а во вториот проактивни мерки.

Засега е отворено прашањето од каде точно ќе се обезбедат пари за финансирање на реализацијата на активностите од акцискиот план, како и тоа дали парите што би се давале за подигање на медиумска писменост и едукација на новинарите нема да бидат начин за нивна корупција од страна на Владата.

Заев рече дека нема да се даваат буџетски средства туку и пари од фондови, како и тоа дека планот не е конечен односно дека ќе се доработува и во него ќе се внесат забелешките на сите засегнати страни.