Во текот на денов премиерот Зоран Заев ќе оствари телефонски разговор со канцеларката Ангела Меркел и ќе се дискутира пристапниот процес на земјава во ЕУ, откри владиниот портпарол Душко Арсовски. Тој додаде дека домашни власти се благодарни што Германија засилено се залага за исполнување на целта – одржување на првата меѓувладина конференција до крајот на годината, што би било сигнал за целиот регион дека се задржува кредибилитетот на Европската унија.

– Паралелно се одвиваат контакти меѓу МНР на Република Северна Македонија и Република Бугарија, но во интерес на процесот е да не се изнесуваат детали, а инаку сите контакти водат кон приближување на позициите. Договорот од 2017 година е одлична рамка и нуди инструменти за надминување на прашањата за кои Софија има дилеми. Апелирам да нема говор на омраза меѓу двете земји, затоа што нов наплив на омраза, во кој било правец, би влијаел и на работата на Комисијата за историски прашања, изјави Арсовски, кој додаде дека нема потреба од нов договор со Бугарија или пак анекс.