Вкусни тајни: Цвеклото го заслужува вашето внимание
Ако не се плашите да експериментирате во кујната и не сте љубител на јадења со месо, тогаш цвеклото задолжително мора да се најде на вашето мени. Непознато е зошто не е популарен зеленчук и не се консумира доволно. А, освен што е вкусно, црвеното цвекло е многу здраво. Помага при метаболизмот и е одлично за подготовка на здрави салати.
Во себе содржи антоцианин, состојка поради која цвеклото ја има карактеристичната црвена боја. Воедно антоцианинот има и антиканцерогени својства. Благодарение на тоа, цвеклото може да помогне против различни болести, вклучително и ракот. Покрај антоцианинот содржи и бетаин. Оваа состојка е корисна за кардиоваскуларниот систем.
Цвеклото може да се консумира сурово, варено, конзервирано или како сок. Сокот од цвекло има својство да ги чисти мочните патишта од токсини и бактерии. Помага во превенцијата на артериосклероза, го намалува крвниот притисок и го зајакнува имунитетот.
Традиционално цвеклото се консумира во облик на салата, најчесто варено, во комбинација со друг зеленчук како што е компир и краставици. Ова е т.н. винегрет салата, која Русите ја подготвуваат за празници. На нивното мени цвеклото често е присутно.
Кај нас цвеклото најчесто се јаде во салата, свежо, во комбинација со друг зеленчук како моркови или зелка. Салатата од цвекло, јаболко и прелив е многу здрава варијанта, ако сакате да се храните и живеете така.
Црвеното цвекло може да се консумира и како дел од цеден сок или салата со моркови и краставици. Може да се подготви на пареа. Одличен рецепт е салата од рендано цвекло со едно рендано кисело јаболко и рака рукола, зачинето со лимонов сок, маслиново масло, сечкан лук и сол.