Доколку не знаете што да зготвите за ручек, нашиот предлог за денес се печени канелони полнети со мелено месо и кашкавал. Ова вкусно италијанско јадење ќе ве воодушеви со својот вкус, а бидејќи е калоричен оброк, предлагаме канелоните да ги послужите со голема чинија зелена салата.

Рецептот е многу лесен за подготовка. Ако знаете како да направите болоњезе сос, лесно ќе го совладате ова јадење во кое сигурно ќе ужива целото семејство.

Потребни состојки:

– 1 глава кромид
– 600 г мелено говедско месо
– 200 мл доматно пире
– 100 мл вода
– лажичка сол
– 250 г гауда или едам
– 250 г канелони
– 500 мл крем за готвење
– 100 г моцарела

Подготовка:

На масло се пржи ситно сечканиот кромид. Кога ќе добие убава жолта боја додадете го меленото месо и посолете. Се добро измешајте, а по 15 минути додадете ги пасираните домати и водата. Покријте и динстајте на оган уште 10 минути. Додадете 200 мл крема за готвење и половина од кашкавалот и гответе уште пет минути. Садот за печење премачкајте го со масло. Наполнете ги канелоните и наредете ги по должина на садот. Остатокот од смесата прелијте го врз канелоните, а потоа и остатокот од кремата за готвење. Одозгора посипете го остатокот од ренданиот кашкавал и моцарелата. Покријте ги канелоните со алуминиумска фолија и ставете ги во рерна загреана на 200 степени. По 35 минути печење, извадете го садот од рерна, извадете ја фолијата и вратете во рерна уште 10 минути. На здравје!